Gipahunong na ni Davao City Mayor ug Vice Mayor-elect Sebastian “Baste” Duterte ang gikalambigitan nga isyu karon sa social media kabahin sa mga babayeng nalambigit sa iyahang amahan, nga si kanhi Presidente Rodrigo Roa Duterte (FPRRD).
Sa usa ka post niadtong Domingo sa buntag, Hunyo 22, giingon ni Mayor Baste nga dili na angay palawman pa ang maong isyu tungod kay ang mga babaye nga nalambigit sa pangalan sa iyahang amahan adunay kaugalingong papel ug kontribusyon sa kinabuhi ug pagbati ni FPRRD.
Matud pa niya, dili man kini angay gamiton aron husgahan ang pagkatawo sa iyang amahan ni sa mga babayeng nalakip sa kontrobersiya.
Aron ipakita nga walay angay ikaulaw sa maong mga koneksyon, gipost usab ni Baste ang mga hulagway sa pipila sa mga babaye kauban si Duterte.
Kini nga lihok, sumala pa niya, usa ka pahinumdum nga angay respetuhon ang personal nga kinabuhi sa uban, ilabi na kung kini wala’y labot sa ilahang serbisyo publiko.
Gihangyo sab niya ang katawhan nga undangon na ang paglabay og negatibong komento, ug ipasabot nga mas daghan pa untang angayng pagahisgutan nga labing mahinungdanon ug makahatag ug kaayohan sa katawhan.
Angay, matud pa niya, nga gamiton ang social media sa mas produktibo ug positibong pamaagi.
