Mga Higala Komusta Ug Maayong Buntag!
Unang higayon nga misulod ang China sa teritoryo sa Pilipinas, gigamit nilang rason ang mananagat nga ilang giingong mipasilong ug namahuway lamang sa dihang gisita sa atong mga otoridad.
Tungod kay duna kage kitay batasan nga naila sa tibuok kalibutan , pinaagi sa pagkamaabi-abihon sa mga bisita gitugotan silang makapahuway apan paglabay sa pila ka buwan ilang gipabarog ang istraktora sa militar sa China.
Sunod, mga mananagat gihapon sa China ang misulod sa teritoryo sa Pilipinas apan ang ilang mga dala kabungkagon ug dili na magamit na mga sakayang pangpanagat, nasayran nga dili diay mananagat hinungdan nga gipapauli sila sa China.
Hinuon nagpasulod pod og tinuod nga mananagat ang China sa teritoryo sa Pilipinas apan ilang gipangguba ang mga gasang o corals ug gipangkuha ang mga produkto sa dagat nga hilabihang pag-amping sa Pilipinas.
Karon batalyon napod sa mga mananagat ang gipasulod sa China sa teritoryo sa Pilipinas. Ug gani hasta ang atong mga mananagat nawad-an na ug pangnibuhian kay pang abugon man sila padulong sa atong kabaybayunan. Sa ingon ani nga sitwasyon hangtod kanus-a kita mag-antos sa pagpanagubuso sa China?
Sa karon anaa na sa duha ka gatos ka mga sakyanan sa pandagat gikan sa China ang nagtuyok tuyok sa isla sa Pag-asa, ang labing dako nga isla sa siyam ka isla nga giokupar sa nasud sa Pilipinas nga kabahin sa singkuwenta kapin ka mga isla nga gitawag og Spratlys group of islands. Una ng gibutyag sa mga pahayagan nga 600 ka mga sakyanan pandagat ang naglutawlutaw sa kadagatan sa giilugan nga mga isla apan hugot nga nakapanagang ang atong kagamhanan nga matud pa anaa lamang sa 200 kapin ka mga barko. Subay sa pagkumpirma sa mga otoridad sa Western Command nga nakabase sa Palawan nga ang maong mga sakyanan sa dagat iya kini sa maritime militia sa China nga ang tumong ug tuyo mao ang pagmentinar sa ilang presensiya sa dapit. Kini nagpasabot lang nga aduna na silay kampo sa amaong area.Ug dili na gyud ilang mga managat. Ang Department of Foreign Affairs nipadangat na og protesta batok niini subay sa report sa AFP. Ug atong hulaton kung unsa ang kalambuan sa ilang giduso nga reklamo.
Ang atong gobyerno todo amping karon sa mga pahayag nga ipagawas tungod atong nasabtan nga kita nakadepende dunay utang karon, mga tabang proyekto sa Tsina ug duna pa gyuy mga kasabutan nga atong gisudlan nga maoy nahimong isyu kabahin sa hisgutanang pagsuspinde sa writ of habeas corpus sa pangulo kung ang mga kritiko padayon sa pagtuki sa maong isyu. Bisan ang presidential spokesman amping man sa iyahang gipangluwatan tungod sa kalig-on karon sa atong relasyon sa maong nasud mao na nga dili ana ikatingala kung napasagdan na ang mga mulo sa mga mananagat dihang dapita. Mao na nga dunay gyuy musaway sa gobiyerno sa Pilipinas tungod sa paghulagway niini nga pagbabaya, nga bisan ug gibiay-biay na kita sa Tsina, murag wala lamang gihapon sa atoa. Daw na -imune na kita sa mga pagpanghasi sa mga Chinese. Si Pangulong Duterte aminado nga dili gyud kita mudaug sa gyera batok sa Tsina, kay tiaw mo na nga kung ato silang suklan tabla ray nagdamgo kita kung kanus-a makaabot sa buwan. Wala man gyud kitay katakos sa pakiggubat sa ilaha kung sa gidaghanon sa pwersa ug mga gamit pangyera, pero alang nako dako kita ug posibilidad alang sa kadaugan sa gyera diha sa korte kay duna kitay gihuptan nga mga lig-ong dokumento ug ebdensya nga makapaduot kanila. Ipaagi ta sa balaud ang pakigbisog batok sa China. Atong ipatigbabaw ang balaud labaw sa tanan. Kay kung tinuod ang mga reklamo sa mga mananagat nga gidid-an sila nga makapanagat didto sa China, hayan kontrolado na sa maong nasud ang maong teritoryo. Ug dinhi na kita nabalaka basin ug mawad-an na gyud unya kita ug pag-asa nga maangkon pa nato ng mga islaha.
