Nasikop ang 66-anyos nga barangay tanod nga si Raymundo sa Talomo Police Station human siya ma-involve sa grabeng panunggaban batok sa iyang silingan nga Person with Disability (PWD) sa Barangay Sta. Cruz, Matina Pangi, Davao City kagahapon, Enero 18, 2026, alas 3 sa hapon.
Sumala sa imbestigasyon sa Talomo Police, nagsugod ang insidente sa dihang miabot ang biktima nga si Manapi, 48-anyos, sa iyang balay. Gipangutana siya sa suspek bahin sa giingong hulga nga gihimo batok kaniya. Wala motubag si Manapi, hinungdan nga nasuko si Raymundo ug miuli sa iyang balay.
Paglabay sa pipila ka minuto, mibalik si Raymundo kauban ang iyang mga paryente nga giila nga sila Avelito, Ash, ug Jade. Nadala nila ang kutsilyo, baton, ug mga bato. Gisugod nila ang atake pinaagi sa paglabay og bato ni Ash nga miigo sa ulo sa biktima samtang gihapak ni Raymundo sa wala nga bukton gamit ang baton. Napugos si Manapi sa pagsulod sa iyang kwarto aron makalikay sa dugang kadaut.
Apan gisundan gihapon siya ni Raymundo. Sa desperadong pagpangga sa kaugalingon, gikuha ni Manapi ang ice pick ug naigo ang tuo nga dughan sa suspek. Samtang nagpadayon ang kagubot, gipadayon sa uban pa ang pagpanglabay og bato nga nakaangol sa bukton, likod, ug ulo sa biktima.
Pag-abot sa mga kapulisan, gilusad dayon ang hot pursuit operation nga misangpot sa pagkasikop ni Raymundo. Ang ubang kauban niini padayon pang gipangita sa mga awtoridad. Si Raymundo karon anaa na sa kustodiya sa Talomo Police Station ug mag-atubang og kaso nga frustrated murder.
