DAVAO CITY – Usa ka barangay kagawad ang gipusil patay sa New Malitbog Galleria, Brgy Malitbog, Panabo City, Davao del Norte.
Gipusil sa wala mailhing suspek ang 42 anyos nga si Herky Abad, barangay kagawad sa Tibungco, Davao City.
Base sa inisyal nga imbestigasyon sa Panabo City Police, nagtindog lamang ang biktima gawas sa sabungan ug sa dihang gipusil kini sa may likod nga bahin sa ulo niini.
Naka-eskapo gilayoon ang suspek sakay sa itom nga motorsiklo.
Narekober gikan sa crime scene ang duha ka basyo sa bala sa caliber .22 ug duha sab ka basyo sa bala sa caliber .45 nga gituohang gigamit sa pagpamusil sa suspek.
Pipila ka minuto human sa shooting incident, nadisgrasya ang suspek ug ang iyang gisakyang motorsiklo sa Daang Maharlika, Brgy New Pandan, Panabo City, hinungdan sa iyang hinanaling pagkapriso.
Tingkagol karun sa prisohan ang wala gihinganlang suspek nga mag-atubang og tukmang kaso.
Ginatun-an pa sa kapulisan ang motibo sa maong insidente.
VIA || Bombo LJ Florendo
