DAVAO CITY – Gipalawman pa karon sa kapulisan ang ilang gipahigayon nga imbestigasyon aron nga masayran kung si kinsa ang mipaluyo sa pagpusil patay kang Barangay 9-A Captain Tata Llubit sa iyang pinuy-anan sa Purok 10, Muslim Village San Rafael Maa ning dakbayan.
Sa inisyal nga imbestigasyon sa kapulisan anaa lamang sa gawas sa ilang panimalay ang biktima ug nagpaka-on sa ilang mga hayop dihang kalit na lamang nga misulod ang armado nga suspek ug gipusil ang kapitan nga maoy hinungdan sa iyang hinanaling kamatayon.
Human ang insidente paspas sab nga misibat ang suspek sa wala matino nga direksiyon.
Nasayran nga gikan sa pagka-kagawad, nahimong kapitan sa lugar si Llubit diin ilado kini sa iyang kampanya batok ginadili nga druga ug kriminalidad sa iyang area of jurisdiction nga gikan sa San Rafael Village nga utlanan sa Maa hangtud na sa Camus Street ning dakbayan sa Davao.
Gipanubayan na sab karon sa otoridad ang motibo sa krimen.
Samtang mitanyag sumala pa karon si Davao City Representative Paolo Z. Duterte ug Brgy. Capt. January Duterte ug P300,000 reward money sa bisan kinsa man nga makahatag ug impormasyon kalabot sa pagpatay sa Barangay kapitan.
Samtang gibutyag ni alyas Boy usa sa mga higala sa Barangay kapitan nga wala sumala pay gibutyag kaniya si Brgy capt. Llubit nga problema apan dako ang pagtuo niini nga adunay kalabutan sa iyang trabaho ang hinungdan sa krimen.
