Gipadayag ni Acting City Director Hansel M. Marantan sa Davao City Police Office (DCPO) nga nakagawas na si Nabalawag Mayor ug mga kaubanan niini gumikan sa kakulangan sa mga gikinahanglan nga dokumento, susama sa Certificate nga usa sa mga rekisito sa pagsumite sa kaso o inquest proceedings.
Matod pa niini, nga importante sumala pa ang kompleto nga papeles aron masiguro ang legalidad sa kaso, hinungdan nga wala niini masumite sulod sa 18 ka oras nga deadline, nga usa sa mga mandato sa kapulisan kung magpasaka og kaso.
Bisan pa man sa maong kalisdanan, gipaklaro ni Marantan nga wala pa nahuman ang ilang paningkamot ug buot gihapon sa kapulisan nga mapasakaan og kaso ang Mayor ug mga kaubanan niini gumikan sa kalapasan sa gun ban ilawom sa Omnibus Election Code R.A 10591.
Gipaambit sa opisyal nga aduna na kini mga ebidensya nga nagasuporta sa maong kaso, ug padayon ang ilang legal nga proseso aron mapatuman ang hustisya.
Kahinumdoman, nga nababagan sa Task Force Davao Sirawan checkpoint ang mga nahisgutan samtang nagpahigayon og plain views inspection sa ilang gisakyan nga pick-up ug nakita ang mga armas ug mga bala sa maong sakyanan.
Nasayran usab nga sa maong panghitabo walay gikapakita nga mga dokumento ang mga nahisgutan kon written authority gikan sa COMELEC alang sa gun ban exemption.
Gikatakda unta nga motambong ang mga nahisgutan sa usa ka Comprehensive Training on Efficient Fund Management sa usa ka hotel ning dakbayan uban ang mga nagkadaiyang Mayor sa Special Geographic Area sa BARMM apan, natanggong kini sa maong checkpoint.
Samtang, gibarogan ni Marantan nga dili kini magpasabot nga mahunong na ang ilang pagbantay sa kalihokan sa mga nadakpan.
Gibutyag niini nga padayon gihapon nga gimonitor ang mga nahisgutang indibidwal aron masiguro nga dili kini makalingkawas sa balaod ug aron matutukan ang ilang posible nga kalambigitan sa ubang ilegal nga kalihokan.
