DAVAO CITY – Nagpadayag sa iyang kapakyasan ingon man nangayo ug pasaylo sa iyang nahimo ang unod sa suicide note nga gibilin sa usa ka lalaki ayha kini nakahukom sa pagkutlo sa iyang kinabuhi.
Una niini, nangayo gilayon ug pakitabang ang usa ka misis human nga iyang namatikdan nga nagbitay na kini sulod sa ilang panimalay sa Purok 6B, Barangay Apokon, alas onse sa buntag niining milabay nga adlaw.
Sumala pa kang Gay Chavez Polison, 45-anyos, residente sa maong dapit, miuli siya sa ilang panimalay aron nga susihon ang iyang bana nga si Roldan Betita Polison, 45-anyos, sanglit wala sumala pa kini miadto sa ilang tindahan ug pipila ka oras siya nga nagpa-abot niini.
Apan sa iyang pagsulod, nakita niini nga nagbitay na ang iyang bana diin gigamit niini sa pagpakatay ang pisi nga iyang gihigot sa li-og.
Dali pa nila nga gidala sa Davao Regional Medical Center apan gideklara kining dead o arrival sa mga doktor.
Sa pagpanubay sa kapulisan, wala silay nakitang foul play sa kamatayon niini.
Gipahiluna na karon ang patay’ng lawas sa biktima sa usa ka punerarya sa Brgy. La Filipina sa nahisgutan nga siyudad.
