DAVAO CITY – Nag-negatibo na sa red tide ang Balite Bay sa Dakbayan sa Mati, Davao Oriental human ang kapin duha ka dekadang nahimong positibo kini sa delikadong algal bloom.
Gani, niadtong tuig 2000, nag-implementar og shellfish ban ang Mati sa nahisgutang dapit, ug adunay gipagulang ordinansa ang Dakbayan alang sa pagbawal sa pagharvest sa mga shellfish.
Gawas pa sa red tide, usa ka tuig usab nga nagpositibo ang maong kadagatan sa paralytic shellfish poisoning.
Gideklara na niadtong Agosto 6 sa Bureau of Fisheries and Aquatic Resources kon BFAR XI nga luwas na sa duha ka katalagman ang Balite Bay. Busa, mamahimo nang ma-harvest, mabaligya, og makaon ang mga kinason gikan sa naasoy nga kadagatan.
Apan, padayon gihapon kining i-monitor sa mga hingtungdang buhatan ang Balite Bay tungod nagabalik-balik ang maong panghitabo sa dapit human lang ang pipila ka bulan.
Ila usab giawhag ang mga mamalitay nga pangitaan nila ang mga mamaligya og certification gikan sa lokal nga panggamhanan nga nagpamatuod nga luwas ipangkonsumo ang mga ginapangbaligyang shellfish sa merkado.
