Giklaro sa Department of Education (DepEd) Region 11 nga usa ka bakak ug walay basihanan ang nagkatag nga post sa Facebook nga nag-ingon nga wala na kunoy Grade 11 sa umaabot nga school year 2025-2026.
Gibutyag ni Jenelito “Dodong” Atillo, ang tigpamaba sa DepEd Davao Region, nga kini usa lamang ka peke nga impormasyon nga nagpalibog sa katawhan. Matud ni Atillo, walay kamatuoran ang maong post ug angay kining dili tuohan.
Iyang giingon nga walay anunsyo nga gikan sa opisyal nga buhatan sa DepEd nga nagsuspenso o nagwagtang sa Grade 11. Busa gi-awhag niini ang publiko nga magmatngon ug likayan ang dali-daling pagtuo sa mga impormasyon nga gikan sa social media.
Giawhag sab sa DepEd ang tanan nga magpakabana sa pagpakigbatok sa pagpakatag sa mga fake news pinaagi sa pagsusi ug pagpangutana sa mga lehitimong tinubdan sama sa DepEd website o opisyal nga Facebook page sa ahensya.
