DAVAO CITY – Naabu ang pinoy-anan sa usa ka tigulang nga nag-inusara na lamang sa pagpuyo sa Purok 10, Sirawan, Toril human miulbo ang sunog kaganinang alas unse sa buntag.
Nasayran sa Bombo Radyo Davao nga gipanag-iya ang naugdaw nga balay sa usa ka Remedios Jumawan Pablo, 82 anyos.
Sa imbestigasyon sa Toril Fire Station nagsumikad ang sunog sa napasagdan nga nilung-ag sa kusena nga bahin ug mikaylap sa tibupk balay nga gama lamang sa kalakat.
Nasayran gikan kang Fire Officer 3 Norman Francis Moratin, imbestigador sa Toril Fire Station nga wala’y kauban ang tigulang sa gi-abtan nga balay dihang miulbo ang sunog.
Mikabat ngadto sa P3,750 ka pesos ang namugnang kadaut sa nahisgutan nga sunog.
Hinmgpit nga napalong ang sunog mga alas 11:20 ang takna kaganinang buntag.
Gipahayag sab ni Barangay Sirawan Barangay Captain Jade Lumpapac nga kini na ang ikaduha ka higayon nga pag-ulbo sa sunog sa ilang barangay karong tuig.
Nahitabo ang sunog sa Sitio Dayap, diin usa sab ka balay ang naabo sa sunog.
