Nadipensahan sa Balangay City High Performing Arts sa Mati City, Davao Oriental ang ilang trono isip kampyon sa Indak-Indak sa Kadayawan 2025 – Open Category.
Gipakita sa grupo ang ilahang talagsaon nga talento ug disiplina pinaagi sa usa ka pasundayag nga naghiusa sa makapahinam nga musika, maanindot nga choreography ug kolorful nga props nga nagpasantop sa kultura ug tradisyon sa Mindanao.
Dugang sa ilahang kalampusan, nadaug usab nila ang espesyal nga pasidungog nga Best in Music, nga naghatag og dugang dungog ug pag-ila sa delegasyon sa Mati City.
Ang maong award usa ka timaan sa ilahang pagpaningkamot ug pagbansay nga giasdang gikan pa sa lokal nga komunidad hangtod sa dagkong entablado.
Nagpabilin nga garbo sa Davao Oriental ang Balangay City High Performing Arts tungod sa ilahang sunod-sunod nga kadaogan sa pinakasikat nga sayaw-festival sa Mindanao.
Ang ilahang padayon nga paglambo ug pagdaug naghatag og inspirasyon dili lamang sa Mati City apan usab sa mga kabatan-onan nga nagtinguha nga makahatag og dungog sa ilang tagsa-tagsa ka lugar pinaagi sa arte ug kultura.
