DAVAO CITY – Resulta sa pagsira sa pipila ka mga kompanya sa natural waterways, nga agi-anan sa tubig sa nahisgutan nga mga dapit ang baha nga miigo sa dakbayan sa Davao kaganinang kaadlawon ug kaganinang buntag.
Kini ang gihatagan ug katin-awan ni Rodrigo Bustillo, Operations Officer sa City Disaster Risk Reduction Management Office (CDRRMO).
Sa mga apektado nga dapit ang kanhi kinse hangtud baynte metros nga agi-anan sa tubig, gipagamay sa mga establisamento ug mga kompanya nga nag-okopa sa dapit hinongdan nga grabe ang bul-og sa tubig matag panahon nga mo-abot ang ulan.
Buot sa CDRRMO operation officer nga ibalik sa mga kompanya nga nag-okopa sa mga gibaha nga mga dapit sa naandan nga kahimtang ang mga sapa ug creek nga ilang gipangserhan atol sa pagtukod sa ilang negosyo sa dapit.
Nabalaka si Bustillo nga mas mo-grabe pa ang dautan nga epekto niini hangtud nga dili wagtangon sa mga establisamento ang nakababag sa tukma nga agi-anan sa tubig sa mga apektado nga mga dapit sa dakbayan.
