Nag-landfall na ang sentro sa Bagyong Nika sa Dilasag, Aurora kaganihang buntag pasado alas-8:00 nga ang mata sa bagyo ang miigo kini sa nasampit nga lugar.
Gilayon nga nagpaguwa ug heavy rainfall outlook ang ahensya sa pipila ka mga lugar.
Gikabalak-an ang intense hangtod sa torrential rain nga mokabat sa 200 mm sa mga lugar sa Aurora, Isabela, Cagayan, Quirino, Nueva Vizcaya, Ifugao, Mountain Province, Kalinga ug Apayao.
Nagpabilin gihapon nga anaa sa signal no.4, ug no.3 ang pipila mga lugar sa northern Luzon.
Samtang sa laing bahin, nagpaguwa ang Department of Agriculture (DA) ug initial damage assessment sa kadaot nga gibilin sa bagyong ‘Marce’ sa sektor sa pagpanguma.
Subay sa report sa DA, mokabat sa P277.75 million ang inisyal nga kantidad sa kadaot nga gibilin sa nasampit nga bagyo, ug naka-apekto kini sa dul-an napulo ka libo nga mga mag-uuma.
Mokabat usab sa 15,670 ka mga ektarya sa mga kaumahan ang naapektuhan nga miresulta sa pagkadaot sa kinatibuk-an nga 796 metriko tonelada sa mga agri products.
Ang rice industry ang nakaangkon pa gihapon ug labing dako nga kadaot, sama sa nahitabo sa nakalabay nga mga bagyo.
