Gikonsiderar karon sa pipila ka magbabalaod ang bag-ong testimonya sa usa ka testigo nga nag-angkon og koneksyon sa intelihensiya isip posibleng haligi sa laing impeachment complaint batok kang Bise Presidente Sara Duterte, nga nagpasiga pag-usab sa tensiyon sa politika sa nasud.
Sumala sa usa ka kongresista gikan sa oposisyon, naghulat pa ang grupo sa pinal nga baruganan sa Korte Suprema may kalabotan sa apela batok sa unang desisyon nga nagbasura sa miaging impeachment tungod sa one-year ban rule. Matod pa niya, ang sunod nga lakang sa Kongreso magdepende sa direksyon nga kuhaon sa hukmanan.
Kung paborableng balihon sa Korte Suprema ang maong ruling, andam kuno ang mga magbabalaod nga ipadayon ang proseso sa Senado nga molihok isip impeachment court. Apan kung molungtad ang kahilom sa desisyon hangtod sa unang mga bulan sa tuig, abli gihapon ang posibilidad nga mosumite og bag-ong reklamo.
Gipadayag nga sentro sa posibleng bag-ong kaso ang alegasyon sa sayop nga paggamit sa confidential ug intelligence funds, lakip na ang mga pahayag sa testigo nga naghisgot sa kuno’y ilegal nga gigikanan sa pondo nga giingong nalambigit sa kampanya sa Bise Presidente kaniadtong 2022.
Gibalikan usab sa magbabalaod nga kaniadto daghan ang misuporta sa impeachment move batok sa ikaduhang pangulo, ug nagtuo siya nga posible pa gihapon makab-ot ang gikinahanglan nga pirma sa Kongreso kon mosugod pag-usab ang proseso.
Sa laing bahin, gipamugos sa kampo sa Bise Presidente nga walay basihan ang mga bag-ong akusasyon, ug gihulagway kini isip bahin lamang sa politikal nga maniobra nga konektado sa diskusyon sa pambansang badyet, samtang padayon ang ilang pagdepensa batok sa tanang pasangil.
