DAVAO CITY – Posibleng maablihan pagbalik ang posibilidad nga mahulipan sa Davao Light and Power Company ang mga lugar sa Davao del Norte nga giserbisyuhan sa North Davao Electric Cooperative kon NORDECO.
Tungod usa na sab ka sugyot balaudnon na sab ang gipapalihok na karon sa kongreso.
Gikanayon sa opisina ni Davao del Norte Congressman Alan Dujali uban ni Davao de Oro District 1 Congresswoman Maria Carmen Zamora nga gipasaka na sa kamara kaniadtong Enero 31 ning tuiga ang House Bill 6995 kon Expanding the Franchise Area of the Davao Light and Power Company Inc.
Kon ugaling maaprubahan kini sa konseho, maapil na sa ma serbisyohan sa Davao Light and Power Company ang Island Garden City of Samal gawas nga nagsilbi kining electric utility sa Davao City, Carmen, Panabo, Dujali ug Santo Tomas Davao del Norte.
Kahinumdumang gi-veto ni Pangulong Ferdinand Marcos Jr. ang naunang house bill alang sa expansion sa serbisyo sa DLPC sa pipila ka bahin sa probinsya.
Kana nga lakang gumikan sa kanunayng agulo sa mga konsumante sa NORDECO mahitungod sa taas nga singilan sa kuryente nga gikamatikod ang pagsaka niini kon itandi kini sa ubos nga diperensya sa singil nga ginapasibaw sa DLPC.
via || Bombo LJF
