DAVAO CITY – Nagpaklaro ang Traffic Enforcement Unit sa Davao City Police Office nga walay quota nga giapas ang kapulisan sa ihap sa mga mapahamtangan og multa dungan sa nanukad karon nga bag-ong Speed Limit Ordinance nga epektibo na sugod kaganihang alas-12 sa kaadlawon.
Gikanayon ni Major Dexter Domingo, hepe sa Traffic Enforcement Unit sa DCPO nga magpabilin gihapon ang ilang pagronda sa mga traffic prone areas ug mga accident prone areas sa dakbayan diin lagmit mahitabo ang mga disgrasya sa kadalanan, bisan pa nga anaa o walay madakpan atol sa unang adlaw sa implemensyon sa maong ordinansa.
Nag-apela sab ang hepe ngadto sa mga Dabawenyo nga musunod sa gipagulang mga speed limits sa mga kadalanan sa dakbayan aron malikayan ang mga susamang insidente.
Ubos sa City Ordinance 0270-23 series of 2023, anaa sa 80 kilometer per hour ang speed limit sa Bunawan-Lasang, Lacson-Buda, ug Carabao Monument sa Toril-Binugao sa Sta Cruz.
Apan, 50 kilometer per hour ang speed limit alang sa mga truck.
Samtang 60 kilometer per hour na ang speed limit sa mga major roads sama sa Ulas Crossing hangtod sa Carabao Monument Waypark, Crossing Panacan-Bunawan Crossing ug ang Davao City Coastal Road; ug 30 kilometer per hour alang sa mga feeder o minor roads nga naga-konekta sa mga major road.
Sa mga tourist streets, 40 kilometer per hour ang speed limit sa mga gagmayng sakyanan ug 30 kilometer per hour sa mga truck.
20 kilometer per hour usab ang speed limit sa tanang public subdivision roads, barangay roads, ug school zones sa syudad.
Samtang adunay ipahamtang na silot alang sa mga magmalapason sa ordinansa nga ₱1,000 alang sa 1st offense, ₱2,000 alang sa 2nd offense, ₱5,000 sa third offense.
Gikanayon sa opisyal nga natapos na ang information dissimination phase sa maong ordinansa busa nahimo nang fully implemented sugod karong adlawa ang pagpatuman niini.
