Nagpadayag sa ilahang kasub-anan ang Police Regional Office (PRO) 11 sa pamilya sa namatay nga si Patrolman Ronie Jr. S. Alcano, nga ang iyang pagpanaw naghatag ug dakong kasubo sa tibuok kapulisan.
Sumala pa sa PRO-11 nga ang iyang matinud-anong serbisyo ug dedikasyon nagpabiling inspirasyon sa iyang mga kauban sa serbisyo sa rehiyon.
Personal nga miduaw si P/BGen. Joseph R. Arguelles, Acting Regional Director sa PRO 11, sa haya ni Patrolman Alcano, uban ang mga opisyal rehiyon.
Personal usab nga naghatag ug pagpasidungog ug ingon man panamilit ang iyang mga kauban, samtang mitunol usab og cash assistance ang PRO 11 sa pamilya.
Giila si Patrolman Ronie Jr. Alcano nga usa ka dedikado nga pulis nga miyembro sa Revitalized Pulis sa Barangay (RPSB) Cluster 9 sa Mabini, Davao de Oro.
Kahinumduman nga nahitabo nakabsan sa kinabuhi ang nahisgutan gumikan sa aksidente sa Prk. 1, Brgy. Balamban, dakbayan sa Tagum pasado alas-12 sa udto, sa adlaw nga Sabado.
Subay sa report, usa ka Raptor pickup nga nag-counterflow ang naggikan sa sayop nga lane ang nakabangga sa biktima nga sakay KLX nga motorsiklo nga nag-overtake sa usa ka traysikol nga nagabaligya og butane gas.
Tungod sa maong panghitabo, nabunal ang biktima sa karsada nga maoy hinungdan sa iyahang kamatayon.
Tungod niini, nagpahimangno karon ang mga otoridad ngadto sa mga motorista nga mag-amping kanunay pagpaneho sa mga sakyanan ug pagtamod sa mga balaod trapiko.
