DAVAO CITY – Gipasalig ni Brig. Gen. Benjamin Silo Jr., bag-ong director sa Police Regional Office (PRO)-11 nga hugtanon niini nga ipatuman ang internal cleansing sa mga nagkadaiyang ranggo sa kapulisan ug gipahimangnoan ang mga personahe nga likayan ang pagkalambigit niini sa illegal nga aktibidad.
Kahinumduman nga kini ang mensahe sa opisyal dungan sa paglingkod niini sa katungdanan.
Una ng gibutyag ni Silo nga ipadayon niya ang mga maayong proyekto, programa ug aktibidad nga makapalambo sa serbisyo sa kapulisan dinhi sa rehiyon.
Gikanayong dakong hagit sa opisyal nga mapalambo pa ang pagserbisyo sa kapulisan sa Davao region ilabi nga daghanan sab ug nahimong kalampusan ang iyang gihulipan nga liderato nga si Police Brig. Gen. Filmore Escobal.
Samtang isip kabahin sa kampanya sa kasamtangang administrasyon, gukdon sab sa kapulisan ang nga nalambigit sa illegal nga druga ug kriminalidad.
Plano s anahisgutan nga mumugna ug Integrity Information Monitoring unit sa PRO XI arun nga mabantayan sab dili lamang ang mga nalambigit sa mga dautang binuhatan kung dili lakip na ang mga badlungon nga pulis.
Angayan matud pa nga hatagan ug importansiya ang courtesy sa kapulisan nga i-deploy ngadto sa komunidad arun nga mabalik ang pagsalig sa katawhan ngadto sa kapulisan.
Gi-awhag sab niini ang kapulisan nga mopailalom sa specialized training on ethics and investigation, ingon man palambuon ang moral ug dignidad sa mga personahe.
