DAVAO CITY – Gipasalig karon sa mga bag-ong hepe sa upat ka mga police station sa dakbayan nga ipadayon nila ang maayong liderato sa ilang gipanghulipan nga mga opisyal.
Kahinumduman nga bag-ong hepe na karon sa Tugbok PNP si Police Major Noel Villahermosa samtang mihulip kaniya sa Bunawan PNP si Pol. Major Milan Naz.
Samtang bag-o nga hepe sab karon sa Sasa PNP si Police Major Alberto Abella ug si Pol Major Ricky Obenza ang sa Baguio PNP diin gihulipan niini si Pol. Major Achilles Baguio kinsa moretiro na sa iyang katungdanan karong bulana.
Gikanayong gawas sa ilang tahas nga bantayan ang tagsa-tagsa nila ka mga Area of Responsibility (AOR), kinahanglan sab sumala pa nga pahugtan ang health protocols ilabi na nga nagpabilin pa karon ang suliran sa covid-19 pandemic.
Sumala pa kang Police Capt. Rose Aguilar, tigpamaba sa Davao City Police Office (DCPO), nga kabahin gayud sa mandato sa kapulisan nga kung duruha ka tuig na ang termino sa usa ka station commander, kinahanglan na sab kini nga hulipan o idistino na sab sa uban nga katungdanan.
