DAVAO CITY – Hingpit na karun nga nanumpa ug magsugod na sa iyang katungdanan si Luna Maria Dominique Acosta, anak ni kanhi First District Councilor ug kasamtangang Mindanao Development Authority (Minda) Chairperson Mabel Sunga-Acosta.
Ang nahisgutan ang bag-ong miyembro sa 19th Davao City Council. Kahinumduman nga mismong si Davao City Vice Mayor Sebastian “Baste” Duterte ang nanguna sa pagpanumpa niini ug gani mitambong dayon kini sa iyang unang session sa konseho.
Nasayran nga siya mismo ang nagahimo kaniadto ug privilege speeches sa iyang inahan human nga nahimong legal staff kini sa buhatan hangtud nga nahimong head sukad 2013.
Daku ang pagtoo sa nahisgutan nga ang iyang edukasyon ug mga kasinatian isip staff ang makatabang kaniya samtang anaa sa iyang journey sa mga nahabilin nga adlaw sa 19th Council.
Mismo ang iyang inahan ang nag-nominate kaniya nga iyang successor sa nabiyaan nga posisyon.
Una ng mibiya sa iyang katungdanan sa City Council si Mabel kaniadtong Enero 11 human ang 18 ka non-consecutive years sa position.
