Nakaplagan sa mga residente ang usa ka masuso ug bag-ong himugsong batang babaye nga gilabay sa kasagbutan kagahapong adlawa sa Purok 11, Barangay San Miguel, Tagum City.
Sumala pa sa mga residente nga nakakita nga nakakulob pa kini sa kasagbutan, samtang gahilak, gumikan gigutom na matud pa kini.
Dali sab kining gikuha sa mga residente aron nga maplastar ang maong alaot nga masusong babaye.
Gilayong gi-turn over kini ngadto sa buhatan sa City Social Welfare and Development Office (CSWDO) Tagum City, aron nga maatiman og sakto ang maong batang babaye.
Daghan ang napungot sa maong panghitabo, gumikan igo lamang sumala pa sa palami ang ginikanan sa maong bata, apan ugaling muabot na ang responsibilidad, ginalikayan na kini og makaangin pa og kinabuhi sa usa ka inosenteng bata.
Sa karun, padayon kining ginasubay karun sa mga otoridad aron nga masuta og si kinsa ang walay pulos nga ginikanan sa maong bata ang naglabay niini sa kasagbutan.
