Gipasakahan na ug kaso sa korte ang usa ka babaye nga nasakpan nga nangolekta ug patad sa “Last Two”. Kasong kalapasan sa Republic Act 9287 o mas nailang penalties for illegal number game nag giduso batok kang Honey Mae Ong Batiancila residente sa Dumanlas, Buhangin District.
Adunay nakitang lig-on nga basehan si prosecutor Daniel Fernandez aron nga pasakahan ang dinakpan human ang reklamo nga giduso nga sa Buhangin police.
Gikanayong nakuha sa posisyon ni Batiancila ang usa ka white board nga adunay listahan sa mga numero, 15 ka mga tally sheets nga adunay markings, calculator, pilot pentel pen, ug tulo ka one-fourth size nga carbon papers.
Narekober sab sa kapulisan gikan sa akusado ang usa ka pares sa gunting, 11 ka mga stubs , duruha ka ball pens, usa ka brown ice cream container, usa ka tupperware, pouch, ug P225 cash.
Gibutyag sab ni Fernandez nga ang pagsikop sa dinakpan ang nakasubay sa balaud.
Naresolba gilayon ang kaso human nga mitubag gilayon ang dinakpan sa mga alegasyon kaniya.
Una nang gibutyag sa Davao City Police Office nga nakaduso na sila ug 114 ka kaso sa anti-illegal gambling sa Davao City Prosecutor’s Office sukad Pebrero 1 hangtud na Marso 22 ning kasamtangan nga tuig.
