DAVAO CITY – Nakabsan sa kinabuhi ang usa ka baynte anyos nga babaye human gitigbas sa iyang ka-live atol sa ilang pakiglalis human sa pagsaulog sa adlawng natawhan sa ilahang anak.
Giila ang patayng lawas sa biktima nga si Jelly Joy Coscos, 20 anyos, residente sa Barangay Dumlan, Maco, Davao de Oro.
Sumala sa imbestigasyon sa Maco Municipal Police, nahitabo ang krimen dihang nag-away ang biktima ug ang suspek nga si Jimmy Genobiagon, 28 anyos niadtong kagahapon sa kadlawon.
Tunga-tunga pa sa ilang panaglalis tungod sa wa mailhing rason, naglaraw ang biktima nga mupahawa sa ilahang balay ug biyaan ang iyang kaipon.
Wala na kapugong ang suspek sa iyang emosyon ug diha-dihang gitigbas niya ang biktima gamit ang sundang.
Samaran ang lawas ug ulo sa biktima hinungdan sa iyang hinaling kamatayon.
Wala na makahimo pag-ikyas ni Genobiagon ug hinuon, mitahan atubangan sa kapitan sa barangay aron atubangon ang iyang krimen.
Tanggong karung ang suspek sa Maco Municipal Police Station nga mag-atubang ug patong-patong nga kaso nga kasamtangang ginahikay.
via || Bombo LJ Florendo
