DAVAO CITY – Gipusil patay ang usa ka babaye sa duha ka armadong lalaki sulod sa iyang balay sa may Purok 6, Barangay Malinawon, Mawab, Davao de Oro, sa miaging adlaw.
Napalgan na lamang sa kapulisan sa Mawab Municipal Police ang nagkadugong patayng lawas ni Genevieve Ramos, hamtung ang panuigon, nagpuyo sa susamang dapit.
Matud pa sa inisyal nga imbestigasyon, anaa lamang ang biktima sa sulod sa ilahang balay, dihang kalit lamang miabot ang duha ka wa mailhing suspek.
Misulod pa sa balay ang usa sa mga armadong suspek nga maoy nipusil sa biktima sa makadaghang higayon. Dali dayong misibat ang mga suspek paghuman sa maong krimen.
Nakahiagum og daghang samad pinusilan sa kalawasan ang biktima busa dali-dali nilang gidala ang biktima sa balay tambalan apan wala na naluwas ang kinabuhi niini.
Nasuta sa kapulisan ang tulo ka basyo sa punto kwarentay singko nga pistola ug usa ka balines nga gituohang gigamit sa mga suspetsado.
Nagpadayon gihapon ang halawom nga imbestigasyon sa maong pagpamusil-patay sa biktima.
via || Bombo LJ Florendo
