Sikop ang usa ka 31-anyos nga construction worker human iyang giluba ang kaugalingong live-in partner gamit ang gunting, human sila mag-away bahin sa pangpalit og gatas alang sa ilang anak, sulod sa giabangang balay sa Purok 5, Barangay Communal, Buhangin District, alas-10 sa gabii, Agosto 31, 2025.
Giila ang maong suspetsado nga si Jason Logroño Lauriano, 31 anyos, construction worker, lumad nga taga Davao City apan kasamtangang nagpuyo sa Purok 5, Communal.
Ang biktima mao si Emelyn Tajo Melod, 25 anyos, housewife, lumad nga taga Malalag, Davao del Sur, nga nagapuyo sab sa maong lugar uban sa ilang anak.
Base sa inisyal nga imbestigasyon sa kapulisan, miabot nga hubog ang suspek gikan sa gawas ug gipangayuan og kwarta sa biktima aron ipalit unta kini og gatas sa ilang anak.
Apan, kalit kining nasuko ug giduslakan sa likod sa liog ang biktima gamit ang usa ka pares nga gunting.
Giingon pa ni Fernando Guimbal, tag-iya sa boarding house, nga duha ngadto tulo na ka tuig nga nangarkila ang magtiayon sa iyang puy-anan, ug aduna nay tulo ka mga anak.
Dugang pa niya, nga hubog gayud ang suspek tungod kay nagselebrar kini sa iyang adlawng natawhan.
Dayon midangop og tabang ang biktima sa kapulisan hinungdan sa hinanaling pagresponde sa mga sakop sa Police Station 5, diin nadakpan ang suspek ug narecover ang gigamit nga armas sa krimen.
Ang biktima gidala gilayon sa Southern Philippines Medical Center (SPMC), Bajada alang sa medikal nga pagtambal ug kasamtangang luwas ang kahimtang.
Sa pagkakaron, anaa na sa kustodiya sa Buhangin Police Station ang suspek, diin gikatakdang pasakaan og kaso nga Attempted Homicide.
