Tingkagol ang usa ka lalaking suspetsado sa pagpamunal gamit ang baseball bat ngadto sa usa ka menor de edad nga babaye atol sa gilusad nga hot pursuit operation sa Montevista, Davao de Oro.
Giila ang suspetsado nga si alyas “Loloy”, samtang ang biktimang babaye kasamtangang ginatambalan sa Montevista District Hospital human nabunalan og baseball bat sa ulo ug bukton sa lalaking iyang giangkasan sa motorsiklo.
Sa inisyal nga imbestigasyon nasayrang gikan namalit og manok ang biktima ug dihang papauli na nag-offer ang suspetsado og pagpasakay sa biktima.
Apan, wala kini gihatod sa iyang balay ug gidala siya sa mingaw na dapit ug gibunal-bunalan.
Narekober usab ang baseballbat nga gigamit sa krimen, ug gipasakahan na og kasong Child Abuse ang suspetsado.
Nagpahimangno ang kapulisan sa tanang ginikanan nga magmatngon ug mamahimong alerto ingon man bantayan ang mga anak sa kanunay.
Gipahinumduman usab nga tudluan ang kabataan sa peligrong mahatag kon dali lang musalig sa mga dili kaila nga mga tawo.
