DAVAO CITY – Gikasabutan sa pamilya ni Katherin Cabiling nga ipa-autopsy ang patayng lawas niini aron masayran niini ang hinungdan sa iyang kamatayon.
Buot sab sa pamilya nga mahatagan og katin-awan ang ispekulasyon nga gipatay matud pa si Katherin sa iyang uyab. Kahinumdumang napalgan ang patayng lawas ni Katherin sa baybayon sa Dahican, Mati City, Davao Oriental kaniadtong Enero 2.
Unang gitudlo sa mga kabanay niini ang uyab sa 18 anyos nga dalaga nga responsable sa kamatayon niini.
Una pa man ang insidente, gibutyag sa pamilya nga nakasinati si Katherin ug pagpangabuso gikan sa iyang uyab pinaagi sa pag-blackmail kaniya sa chat nga ipagawas ang mga law-ay nga hulagway kon makigbulag ang biktima.
Nasuta sab sa pamilya nga bulag na daan si Katherin sa iyang uyab una pa man mahitabo ang maong krimen.
Unang gikadismaya sa pamilya ang mga nanggawas nga resulta sa medico legal nga walay makita nga gigamitan og pwersa o dili ba kaha fatal wound nga gikamatyan sa biktima ug ang bun-og nga nakita sa lawas niini posible matud pang gumikan lang sa dagkong bato gumikan sa kakusog sa hapak sa balod.
Nanawagan sab ang pamilya ngadto sa uyab ni Katherin nga nagtago-tago karon, nga magpakita na aron matino na ang mga pasangil batok kaniya.
Gikatakdang ihatod sa ulahing kapahulayan si Katherin karong Martes, Enero 10.
via || Bombo LJF
