Gitawag nga baseless kon walay basehan ni Atty. Manases Carpio ang testimonya ni Kanhi Customs Intelligence Officer Jimmy Guban kabahin sa paglambigit sa iyang pangalan kalakip na sa bayaw niining si Representative Paolo “Pulong” Duterte sa drug trafficking incident kaniadtong tuig 2018.
Sa gipaguwa nga pamahayag sa maong abogado, gibutyag niining bakak, malisyoso, ug politically motivated ang gihimo ni Guban sanglit walay kamatuoran ang maong alegasyon.
Dugang pa niini nga isip pribadog indibidwal ug abogado, labing ginatagaan niini og pagtagad ang proteksyon ug kaayohan sa iyang pamilya lakip na ang pagpanalipod sa katungod ug interes sa mga kliyente niini.
Ginapaningkamotan matud pa sa nahisgutan ang pagbulag sa politika ug bisan unsang butang nga adunay kalabotan sa gobyerno.
Gumikan niini, malaumon si Carpio nga ang mga meymbro sa Quad Committee ang adunay katakos sa pag-ila sa kamatuoran ug dili sa mga testimonya ni Guban.
Nahimong ehemplo sa abogado ang way pagduha-duhang pag-angkon ni Guban sa Quad Commitee kaniadto sa pagmugna og mga fabricated affidavits nga iyang gisumente atol sa Senate Inquiry ug Court Proceedings.
Una nang gilimod ni Representative Paolo Duterte ang maong alegasyon lakip na ang pag-ila kay Jimmy Guban.
Kahinumduman sab nga sa nakalabay nga dlaw, nagpaguwa og pamahayag si Vice President Sara Duterte, kinsa asawa ni Carpio nga dili na kini mohatag og pamahayag sa mga isyu nga wala naglambigit sa iyang pangalan, apan giangkon niining init ang politika karong panahona.
Alayon niini, gihangyo ni VP Sara ang publiko nga dili magpadala ug mas maayong pagatagaan na lamang og pagtagad ug kasulbaran ang mga mahinungdanong butang, susama na lamang sa inflation o pagtaas sa presyo sa mga palaliton sa nasud.
