Gi-akusahan sa usa ka social media influencer si kanhi Presidential Spokesman Harry Roque nga mao ang nagpaluyo kuno sa kontrobersyal nga deep fakes video nga nagpakita nga migamit kuno ug iligal nga droga si Pangulong Ferdinand Marcos Jr.
Sa gisubmitar nga affidavit ni Vicente Bencalo “Peebles” Cunanan sa pagdungog sa House Tri-Comm, gikanayon niini nga siya ang nagtuo nga si Atty. Roque ang orihinal nga tinubdan sa polvoron video ug kini ang nagpakatag niini sa publiko aron dauton ang kredibilidad sa presidente.
Kahinumduman usab niini ang gisulti ni Atty. Roque nga maayo kining magpahagsa ug gobyerno. Gibutyag usab ni Cunanan nga ang nahitabong private dinner niadtong Hulyo 7, 2024 sa Hong Kong ang gihimo pagkatapos sa pro-Duterte event o ang Maisug Rally ug mitambong si Roque, kanhi executive secretary Vic Rodriguez ug influencers nga sila si Atty. Glen Chong, Atty. Trixie Cruz-Angeles, Dr. Lorraine Badoy, Sass Rogando Sassot, Joie de Vivre ug Tio Moreno.
Sa nahisgutang dinner, gipahayag kuno ni Roque nga nadawat niini ang acreenshot gikan sa paryente nga usa ka politiko nga lalaki ug gipagawas nga si Pangulong Marcos ang migamit ug cocaine.
