Gibutyag ni Atty. Levi Baligod nga personal niining gisusi ang affidavit sa mga retiradong sundalo nga iyahang giubanan sa usa ka press conference bag-ohay lamang.
Kahinumduman nga una ng giakusahan sa mga nagpailang retiradong sundalo nga adunay nahitabong binayranay gikan sa kampo ni kanhi Kongresista nga si Zaldy Co padulong sa ubang mga politiko ug mga representante sa International Criminal Court (ICC), may kalabotan sa imbestigasyon sa drug war sa miaging administrasyon.
Sumala kang Baligod, personal niyang gisusi ang affidavit sa mga kanhing sundalo human sila ipaila kaniya niadtong miaging tuig.
Ang mga sundalo kaniadto nagsilbi isip security details ni Zaldy Co, lakip si retired Marine Sgt. Orly Guteza nga unang mitungha sa usa ka hearing sa Senate Blue Ribbon Committee.
Sa dihang gipangutana ang abogado ngano nga iyang giuna pagpagawas sa publiko ang sulod sa mga affidavit, iyahang gibutyag nga iyang giobserbahan ang executive ug legislative departments, ug giingon niini nga lisod magsalig sa maong mga institusyon.
Busa, midisisyon kini nga ipahibalo una sa publiko ang sulod sa mga affidavit, ilabi na kay wala sila maglaum nga magpakita og interes ang lehislatura sa ilahang gibutyag nga impormasyon.
Bisan paman niini, nagpabiling determinado si Baligod nga mosumite og kopya sa Office of the Ombudsman. Gibarugan usab niya nga wala kini nagpagawas og bisan unsang kopya sa affidavit, bisan pa sa pagpagawas sa giingong kopya niini online.
