Human mipanaw si Pope Francis sa edad nga 88-anyos Lunes, Abril 21, o sa iyang tinuod nga pangalan nga Jorge Mario Bergoglio, magtigom pag-usab ang mga Cardinal sa Roma alang sa Conclave nga mopili sa bag-ong Santo Papa.
Kahinumdoman nga si Pope Francis ang unang Latin American nga namuno sa Simbahang Katoliko, ug daghan ang naglaum nga usab maghimo og kasaysayan ang Simbahan karong panahona.
Nagsugod na ang mga estorya kabahin sa posibilidad nga ang sunod nga Papa mahimong gikan sa Aprika o Asya.
Mga Posibleng Mamahimong Santo Papa:
Cardinal Peter Turkson (76 anyos) – Gikan sa Ghana. Posibleng unang Santo Papa nga Aprikano. Nailhan sa iyang papel isip peace envoy sa South Sudan ug sa iyang mga panglantaw kabahin sa isyu sa LGBTQ+ sa Africa.
Cardinal Luis Antonio Tagle (67 anyos) – Gikan sa Pilipinas. Kanhi Arsobispo sa Maynila ug karon opisyal sa Vatican. Posibleng unang Santo Papa nga Asyano. Nailhan nga liberal ug usa sa mga nanawagan og pagsabot sa LGBTQ+ community ug sa mga magtiayon nga nadiborsyo.
Cardinal Pietro Parolin (70 anyos) – Gikan sa Italya. Sekretaryo sa Estado sa Vatican ug gitawag nga “continuity candidate.” Adunay halapad nga kasinatian sa diplomasya apan gibatikos tungod sa kasabutan sa taliwala sa Vatican ug China.
Cardinal Péter Erdő (72 anyos) – Gikan sa Hungary. Usa ka konserbatibo gikan sa kanhing Soviet bloc. Usa sa mga misupak sa paghatag og komunyon sa mga Katolikong bulag sa ilahang kapikas o nagbalik og minyo.
Cardinal José Tolentino de Mendonça (59 anyos) – Gikan sa Portugal. Usa sa labing linghod ang edad nga kandidato. Abri sa modernong kultura, nailhan isip makabag-o ug intelektuwal.
Cardinal Matteo Zuppi (69 anyos) – Gikan sa Italya. Nailhan sa iyang mga misyon alang sa kalinaw, lakip na ang sa Ukraine. Duol kang Pope Francis ug matinud-anong molihok sa mga isyung pangkatilingban.
Cardinal Mario Grech (68 anyos) – Gikan sa Malta. Nanawagan og bag-ong paagi sa pagsulti sa Simbahan kabahin sa mga isyu sama sa diborsyo ug same-sex relationships.
Cardinal Robert Sarah (79 anyos) – Gikan sa Guinea. Posibleng usa pa ka Aprikano nga mahimong Santo Papa. Bisan ug taas na og edad, nailhan siya sa iyang lig-on nga konserbatibong baruganan, ilabi na sa mga isyu sa Katoliko.
KOLOR SA ASO GIKAN SA CHIMNEY
Ang proseso sa eleksyon sa bag-ong Santo Papa magsugod sulod sa Sistine Chapel sa Vatican. Sumala sa tradisyon, mokanaog og boto ang mga Cardinal duha ka higayon sa usa ka adlaw hangtod adunay makakuha og kapin sa duha ka ikatulo (2/3) nga boto aron mapili isip bag-ong Santo Papa.
Isulat ang boto sa usa ka card nga adunay Latin nga pulong nga “Eligo in Summum Pontificem,” nga nagpasabot “Gipili ko isip Kataas-taasang Santo Papa.” Sa dili pa ihulog ang card sa usa ka bulawanong chalice, mag-ampo usa ang Cardinal.
Samtang nagpadayon ang pagboto, liboan ka mga tawo ang magtapok sa St. Peter’s Square aron tan-awon ang aso nga mogawas sa tsimenea sa Sistine Chapel.
Kung walay napili nga Papa, sunogon ang mga balota ug gamitan og kemikal nga magpahimo og itom nga aso kini timailhan nga wala pa’y nahimong bag-ong Santo Papa.
Kung adunay napili, puti nga aso na ang mogawas ug kini timailhan nga naa na’y bag-ong Santo Papa.
