Nagpadayon ang Ancillary Services Unit (ASU) sa Davao City sa ilang mga lakang sa pagpalimpyo ug pagmentinar sa drainage system sa siyudad aron malikayan ang baha sa panahon sa ting-ulan.
Kaniadtong miaging buwan, 41 ka drainage areas ang nalimpyo niini, lakip na ang Bangkerohan Public Market, Catalunan Grande, ug Matina Crossing.
Nag-operate ang ASU gamit ang tulo ka shifting teams gikan Lunes hangtod Sabado.
Gibutyag ni ASU Head Paul Bermejo, nga napulo ka tawo matag team gikan sa City Environment and Natural Resources Office (CENRO) ang ginapadala aron limpyohan ang mga kanal ug inlet ning dakbayan.
Nagtinguha ang City Engineer’s Office (CEO) ug ASU nga siguruhon niini ang mga drainage system nga magpabiling limpyo aron malikayan ang baha, ug gina-una sumala pa sa buhatan ang mga lugar nga kanunay ginabahaan.
Gipasabot ni Bermejo nga kung taas na ang tubig, kinahanglan maghulat ang buhatan nga muobus ang tubig aron makita sumala pa niini ang inlet.
Gina-awhag niini ang mga Dabawenyos nga mamahimong responsable sa pagdispose sa ilang basura aron malikayan ang pagbara sa mga drainage.
Gina-awhag usab sa opisyal ang mga residente nga daling itaho sa buhatan ang mga problema sa drainage pinaagi sa pag-email o pag-tawag sa telepono.
