Gibasura sa Quezon City Prosecutor’s Office ang reklamong assault nga gisang-at sa kapulisan batok kang Bise Presidente Sara Duterte kalabot sa pagbalhin sa ospital sa Chief of Staff sa Office of the Vice Presisdent (OVP) sa miaging tuig.
Giakusahan sa Quezon City Police District si VP Sara, ingon man ang hepe sa iyang security detail, ug uban pa tungod sa gikabutyag nga direct assault, disobedience to authority, ug grave coercion tungod sa gikaingong pagbabag nila sa pugsanong pagbalhin sa OVP chief of staff nga si Zuleika Lopez ngadto sa usa ka pribadong hospital.
Kahinumdoman nga gimanduan si Lopez nga e-detene sa House of Representatives, kung asa gikatahong nasakit ug gisultihan nga ibalhin siya sa Correctional Institute for Women sa Mandaluyong City.
Resulta kini sa pagdungong sa House of Representative may kalabutan sa gikaingong paggamit sa pundo sa OVP nga wala napamatud-an.
Matod sa kapulisan nga ang mga video nagpakita nga ang security head ni Duterte nga si Army Col. Raymund Dante Lachica, pisikal nga gi- assault si police doctor Lt. Gen. Van Jason Villamor atol sa insidente kaniadtong Nobyembre 23, 2024.
Apan sa usa ka resolusyon nga pinetsahan og Enero 17, nasuta ni Assistant City Prosecutor Criscelyn Carayugan-Lugo nga walay “prima facie” kon makatarunganon nga ebidensya aron pasakaan si Duterte ug Lachica og kasong Direct Assault, Disobedience of Authority, ug Grave Coercion.
Dugang pa sa piskal, nga ang mga buhat ni Duterte ug Lachica dili makonsidera nga “direct assault” tungod kay wala sila miatake, migamit ug material force, ug nanghadlok o misukol kang Police Lt. Col Villamor.
Ang nakita matud pa nga pagbabag ug pagpugong wala naglangkob sa direct assault o physical force.
