DAVAO CITY – Subling nanumpa isip bag-ong Barangay Kagawad sa Brgy. Sawata, San Isidro, Davao del Norte ang asawa sa napusil-patay nga si Kagawad Jay Glen Dela Rama.
Ang asawa ni Jay Glen nga si Jocelyn Dela Rama ang gitahasan nga mulingkod sa nabakanteng katungdanan nga nagsumikad sa Rules of Succession sa Section 45 sa Republic Act 7160 kon Local Government Code of 1991.
Mismong sila San Isidro Municipal Mayor Silvano Gaje inubanan ni Municipal Local Government Operations Officer Rose Ann Macabontoc ang mipahigayon sa pagpanumpa ni Jocelyn.
Makauban sab sa Barangay Council ang kapitan sa barangay nga si Alberto Suarez.
Sa laing bahin, at large gihapon ug kasamtangan pang ginapangita ang mga armadong suspek nga nakapusil-patay kang Jay Glen niadtong Nobyembre 14.
Nagpadayon gihapon ang mga otoridad ilabi na ang gimuntar nga SITG sa pag-locate sa gikahimutangan sa mga suspetsado.
Gilubong na ang patayng lawas ni Jay Glen niadtong Nobyembre 24.
via || Bombo LJF
