DAVAO CITY – Dako na lamang ang kakurat sa 14 anyos nga batang babae human makaplagan niya ang iyang mga ginikanan nga wala nay mga kinabuhi sa ilaha mismong panimalay sa Purok 1, Lopez Street, Brgy. Aplaya, Digos City, kaganihang alas 5:30 sa buntag.
Subay sa inisyal nga imbestigasyon sa kapulisan, gisaysay sa anak sa duha ka biktima nga si alyas Jessa, 14 anyos, nga sa dihang pagmata niya sa buntag, igo na lamang niining nakaplagan ang iyang inahan nga si LYZA CAPULI BAJENTING, 32 anyos, nga wala nay kinabuhi sa salog sa ilang sala.
Sa pikas bahin, nadiskubrehan usab niini ang iyang amahan nga si JAIMELITO ALBO BAJENTING , 50 anyos, walay trabaho, nga nagbitay na sa may punoan sa lubi gamit ang pisi nga gama sa nylon.
Dugang pa sa imbestigasyon, gikanayon sa mga nakasaksi nga adunay natigayong panaglalis tali sa magtiayon gumikan sa wala pa masutang rason.
Ning kasamtangan, padayon gilusad sa mga otoridad ang imbestigasyon mahitungod sa maong ngilngig nga panghitabo.
