DAVAO CITY – Nadakpan sa operasyon sa Criminal Investigation and Detection Group (CIDG) 11 ug Philippine Drug Enforcement Agency (PDEA) 11 ang duha ka mga armadong kalalakin-an atol sa raid niini sa Bangkal kagahapon.
Unang nadakpan si Zosimo Baclay sa Central Park Subdivision nga napalitan ug usa ka sachet sa shabu ug usa ka libo ka pesos nga buy bust money.
Nasakmit sab kaniya ang lain pang lima ka sachet sa gituohang shabu nga gibana-bana nga mokantidad ngadto sa tresientos mil ka pesos.
Kalakip sa na-recover sa kapolisan ang ponto kwarenta y singko kalibre nga armas nga dunay unom ka mga buhi nga mga bala.
Lain pang nadakpan mao si Jamal Sultan, alyas Tol nga nakuha-an ug usa ka sachet sa gituohang shabu nga kapin sa trese mil ka pesos ang kantidad, ug usa ka revolver nga dunay upat ka mga bala.
Kasong kalapasan sa Republic Act 9165 Comprehensive Dangerous Drug Act of 2002 ug illegal possession of firearms and ammunition ang atubangon sa mga dinakpan.
