Gimando ni Manila Archbishop Jose Cardinal Advincula ang pag-ampo sa ‘Oratio Imperata para sa Bayan’ sugod sa ikatulong semana sa Kwaresma (3rd Sunday of Lent). Kini ang mahitabo sa Marso 22-23 ning tuiga.
Subay sa Circular No. 2025-19 nga gipagawas kagahapong adlawa, tumong niini ang pag-angkon sa kalinaw, hustisya, ug panaghiusa, ilabi na sa nagkataas nga tensiyon sa pulitika sa nasud.
Gibutyag pa sa sirkular ni Cardinal Advincula nga sa nahitabo sa miaging mga adlaw, migula ang nagkadaiyang opinyon ug panglantaw sa nagkalain-laing mga plataporma.
Matud pa niya, ang tibuok nasud anaa sa panahon sa krisis, panagbangi, ug grabeng kalibog.
Tungod niini, maayo nga maghiusa sa pag-ampo ang nag-unang lakang aron makab-ot ang gitinguhang kalinaw, hustisya, ug panaghiusa.
Pinaagi sa pag-ampo, naglaom ang Manila Archdiocese nga paminawon sa Diyos ang mga pangaliyupo sa matag usa ug pagaayohon ang daw nagkabahin-bahin nga nasud.
