Nasinatian sa pipila ka mga dapit sa Davao Region ang mga nagkadaiyang mga pagbaha ug landslide, hilabi na ngadto sa mga dapit sa Davao Occidental, Davao del Sur ug Davao Oriental, niadtong adlawong Huwebes.
Kini maoy subay sa taho nga gipadangat sa Public Information Officer sa Office of Civil Defense (OCD)XI nga si Alexie Puerto.
Dugang pa sa maong taho nga sumala pa, mukabat sa 877 ka mga pamilya ang nahimong apektado sa mga pagbaha, diin katugbang kini sa 3,069 ka mga indibidwal, gikan sa 3 ka mga baranggay sa Malita, Davao Occidental, samtang aduna sab pipila ka mga ihap sa mga apektadong indibidwal gikan sa Brgy. Manikling, Sab Isidro, Davao Oriental, diin dali na sab kining gipapahikling.
Sumala pa nga aduna na sab gipangtagana nga 4 ka mga evacuation centers alang ngadto sa mga Internally Displaced Persons diin mikabat ang ihap 205 ka mga pamilya kon katugbang sa 903 ka mga indibidwal ang naggikan sa 3 ka mga baranggay sa Malita, Davao Occidental ug 10 sab ka mga pamilya ang naggikan sa Barangay of San Isidro.
Samtang, maagi-an na ang Lais Bridge sa Malita Davao Occidental human nga naputol kini tungod sa nahitabong pagbaha niadtong nakalabayng gabii, gumikan sa kusog nga bundak sa ulan.
Subay sa report gikan sa MDRRMO nga pasado ala-una sa hapon kagahapong adlawa, gideklara na kini nga maagi-an na sa mga motorista ang nasampit nga tulay.
Una ng dili maagi-an ang maong tulay sa tanang klase sa mga sakyanan nga nagkonekta sa Davao – Sarangani Coastal Road sa munisipalidad sa Malita, Davao Occidental padulong sa mga munisipalidad sa Don Marcelino ug Jose Abad Santos gumikan sa pagbaha nga nakan-kan ang kilid nga bahin sa tulay gumikan sa kusog nga bundak sa ulan nga dala sa Intertropical Convergence Zone (ITCZ).
