Naabot na sa kapin 9.7 milyon ka indibidwal kon katugbang sa 2.6 milyon ka mga pamilya ang kasamtangang naapektuhan gihapon sa miaging mga bagyong Crising, Dante ug Emong, subay kana sa datos sa National Disaster Risk Reduction and Management Council (NDRRMC).
Gikan sa maong ihap, diin 7,479 ka pamilya katugbang sa 28,500 ka mga indibidwal ang nagpabilin pa gihapon sa mga evacuation center, samtang 11,957 ka pamilya o hapit 40,597 ka mga indibidwal ang kasamtangang natabangan ug natagaan og hinabang nga wala sa sulod sa mga evacuation center.
Gawas pa niini, nagpabilin usab sa 37 ka mga indibidwal ang natala nga namatay tungod sa miaging mga bagyo, diin lima niini ang napamatud-an na samtang 32 pa ang kasamtangang ginavalidate.
Samtang, nakahipos usab ang NDRRMC og kinatibuk-ang ihap nga 108,375 ka nadaot nga panimalay nga naggikan sa mga rehiyon sa Ilocos, Cagayan Valley, Cordillera Administrative Region, Central Luzon, CALABARZON, MIMAROPA, Bicol Region, Western Visayas, Negros Island, Central Visayas, Zamboanga Peninsula, Northern Mindanao, Davao Region, SOCCSKSARGEN, CARAGA, ug Bangsamoro Region.
