DAVAO CITY – Gibutyag ni Col. Cosolito Yecla, commander sa Task Force Davao (TFD) nga dakong tabang ang ilang gipahigayon nga Anti-Terrorism Forum ngadto sa mga vendors sa San Pedro Square aron nga masayod ang mga nahisgutan kung unsa ang ilang mga angayan nga himuon.
Sumala kang Col. Yecla, inay nga dili tugtan ang mga vendors nga mamaligya sa San Pedro Square panahon nga adunay ipahigayon nga mga dagkong aktibidad sa siyudad, himuon na lamang nga asset o kaabag sa TFD ang mga nahisgutan aron masiguro nga mabantayan kadtong mga adunay dautan nga plano.
Hinuon daghanan sa mga manindahay sa lugar ang mipakita ug pag-uyon sa Task Force Davao (TFD) sanglit sila ang mawad-an ug panginabuhian sa higayon nga pasirad-an ang lugar.
Atol sa forum, gipakita sa mga sakop sa TFD ang mga nagkadaiyang klase sa bomba nga sagad gamiton sa mga terorista.
Samtang plano sab karon sa TFD nga magpahigayon usab ug forum sa mga vendors sa terminal nga sagad sab nga dagsaon sa mga tawo.
