Mas dako ang tsansa nga moaginod ang sugyot nga Anti-Political Dynasty Bill, human sa pahayag sa Malacañang nga suportado niini ang pagpasa sa maong balaod.
Mao kini ang nakita ni Senador Bam Aquino, nga miangkon usab nga kabahin siya sa usa ka political family.
Sumala ni Aquino, sa dili pa mogawas ang anunsyo sa Palasyo, nagtuo kini nga “lisod” gihapon mapasar ang maong sugyot bisan pa nakaduso na sila og ilahang kaugalingong bersyon.
Sa pangutana kung panahon na ba aron ideklarang urgent ang Anti-Political Dynasty Bill, sumala sa senador nga bisan pa nga positibo nga simbolo kung ipahimangno kini nga urgent, dili pa kini kinahanglan karon.
Nanghinaut si Aquino nga sa unang bahin sa sunod tuig mogawas na ang committee report sa bill aron masugdan na ang deliberasyon.
Miangkon usab si Senador Kiko Pangilinan nga dili sayon ang pagpasa sa Anti-Political Dynasty Law, ilabi na kay kapin upat ka dekada na kini nga nakaong-ong.
Bisan pa sa dugay na nga paghulat, nanawagan siya nga suportahan sa mayorya sa Kongreso ang pag-uswag sa sugyot, ug gibutyag nga nakaabot na kini sa committee report ug angay na nga iduso ngadto sa plenary deliberations.
Dugang pa ni Pangilinan, adunay 10 ka mga petisyon nga nakaong-ong sa Korte Suprema nga naghangyo nga ideklarang supak sa Konstitusyon ang mga political dynasty.
Kinahanglan na kini, matod niya, nga tun-an ug desisyunan sa mga mahistrado.
