Giaprubahan na sa ikatulo ug katapusang pagbasa sa Senado ang Senate Bill No. 2868 o mas nailhan nga Anti-POGO Bill, nga nagbawal sa operasyon sa tanang Philippine Offshore Gaming Operators (POGO) sa nasod.
Tanan nga 23 ka mga senador ang mibuto pabor sa maong sugyot nga balaod, nga nagdeklara nga iligal ang tanang klase sa offshore gaming operations sa Pilipinas.
Matod ni Senador Sherwin Gatchalian, usa sa mga principal sponsor sa maong balaod, nga ang pagpasa sa Anti-POGO Bill usa ka dakong lakang aron masiguro ang hingpit nga pagpahawa sa nahabilin nga operasyon sa POGO ug aron magpadayon ang pagpugong niini bisan pa matapos ang kasamtangang administrasyon.
Gipasabot usab niya nga daghan na ang ebidensya nga ang POGO industry nahilambigit sa daghang krimen, sama sa human trafficking, torture, illegal detention, cybercrime ug uban pa, nga nagpahamtang og peligro sa seguridad sa nasod ug kalinaw sa komunidad.
Sa pagsagop sa maong balaod, gilauman nga mas mapalig-on ang legal nga basehan sa hingpit nga pagwagtang sa POGO operations, ug sa pagsulod sa Pilipinas sa mas limpyo, luwas ug makiangayon nga negosyo ug pamuhunan.
