DAVAO CITY- Mas gipakusgan karon sa lokal nga panggamhanan ang pagpatuman sa Anti-Mendicancy Law dinhi sa syudad.
Kini human namatikdan ang nagkadaghang ihap sa mga indibidwal nga nagapanglimos sa nag-unang mga kadalanan sa dakbayan.
Sumala pa ni Third District Councilor Wilberto Al-ag, chairman sa Committee on Social Services nga base sa ilang monitoring kauban ang City Social Welfare and Development Office, kadaghanan sa mga nagapanglimos sa kadalanan ang dili gikan sa syudad kondi sa mga kasigpit nga dapit partikular na sa Sta Cruz o probinsya sa Davao del Sur.
Giklaro usab niini nga wala nay taga Davao sa nahisgutan gumikan sa tahas niining gihatag sa CSWDO nga dalaon sa center ang ilang mabantayan.
Ning kasamtangan, padayon ang ginalusad nga monitoring sa maong buhatan kalakip na ang pagpahigayon og information dissemination, susama na lamang sa paghatag og mga flyers, pagpilit og mga stickers sa mga establishemento ug mga pampublikong sakyanan.
Kini aron mapahinumduman ang katawhan nga bawal gayud ang paghatag og sinsilyo sa mga nashigutan.
Pagpasabot pa sa opisal, usa kini ka nasudnong balaod kontra sa pagpangabuso sa mga bata, ingon man mahimong luwas ang mga motorista sa kadalanan.
