DAVAO CITY – Nagpahigayon na ang anti-cybercrime unit sa Police Regional Office XI og “cyber patrolling” aron mapugngan ug maila ang mga indibidwal nga nagpakatag og sayop ug dili berepikadong impormasyon sa social media mahitungod matud pa sa gapanghitabong krimen sa syudad sama sa kidnapping, hold-up incidents ug uban pa.
Subling gipaklaro ni Pol. Major Eudisan Gultiano, tigpamaba sa PRO XI, nga walay kamatuoran ang gikaingong robbery ug kidnapping incidents sa Davao region. Busa hugtanon karon ang pagpaningkamot sa otoridad nga mapugngan ang susamang krimen nga ginapahigayon sa cyber space gumikan ang pagpakatag sa maong mga fake posts ang nakahatag gayud og dili maayong imahe sa syudad nga una nang giilang one of the safest city.
Pinaagi sa cyber patrolling, maila sa otoridad ang mga dummy accounts nga maoy ga-post og mga dili berepikadong impormasyon mahitungod sa kidnapping ug robbery incidents. Hinoon, giangkon ni Gultiano nga usa ka hagit alang kanila ang pag-ila sa mga dummy accounts apan adunay sistema nga mamahimong gamiton alang niini. Kahinumduman nga bag-ohay lamang, usa ka Charles Japheth Lagradante, 18 anyos ug usa ka estudyante ang gipasakaan og kaso mahitungod sa paglapas sa Article 154 o ang “unlawful use of means of publication and unlawful utterances” gumikan sa pag-post niini og unverified reports mahitungod sa matud pa kuyanap nga kidnapping ug pagpang-hold-up sa pipila ka bahin sa dakbayan.
