DAVAO CITY – Gipaniguro sa bag-ong gipalabang nga Anti-Bullying Ordinance dinhi sa Davao City ang kaayohan sa mga magtutungha ug trabahante batok bullying.
Sumala sa awtor sa maong ordinansa nga si Davao City Third District Councilor Enzo Villafuerte atol sa pakighinabi sa Bombo Radyo Davao, iyang gikanayon nga ilawom sa maong ordinansa ang pagpamugna sa matag tulunghaan ug workplaces og Anti-Bullying Policy nga maoy musubay sa kaso sa bullying aron dali kini maresolba ug dili na masantop pa sa pagkinasuhay.
Subay sa probisyon sa balaod, mapahamtangan og multa ang matag insitusyon nga walay gibuhat sa partikular nga kaso sa bullying, lakip na ang posibleng revocation sa ilang lisensya.
Ang mga malapasong menor ang mag-atubang og intervention and diversion program, samtang ang mga masinupakon nga anaa sa legal nga edad, mag-atubang og tulo hangtud unom ka bulan nga pagkapriso, ug multa gikan P3,000 hangtud P5,000.
Dugang pa sa konsehal, dungan sa gilaumang implementasyon niini ang pagpanubay sa natalang datos sa mga kaso sa bullying gikan sa mga nagkandaiyang institusyon sa dakbayan.
Gipaklaro sab ni Villafuerte nga adunay basehan ang pagpunting sa balido nga kaso sa bullying diin mamahimong apektado ang mental nga estado sa usa ka biktima nga nag-agi og masagunsunong pagpanamastamas gikan sa unsa ka bully.
Ilawom sab sa maong ordinansa ang pagpamugna sa mga Anti-Bullying Desk sa matag barangay ug Anti-Bullying Hotline alang sa pagdangop sa mga kaso sa bullying. Kasamtangan pang ginabuhat ang implementing rules and regulations sa maong balaod una pa man kini mapirmahan ni Davao City Mayor Sebastian Duterte.
Kahinumduman nga kaniadtong Abril 13 ning tuiga, giuyunan sa halos tanang myembro sa Sangguniang Panglungsod ang maong ordinansa diin mahisakop ang tanang kaso sa bullying sa tulunghaan, trabahuan ug mga pampublikong lugar.
via || Bombo LJF
