Hingpit nga gikondina sa pipila ka mga sakop sa animal welfare advocate sama sa Bantay Hayop Davao, labot sa usa matud pa ka post sa usa ka netizen ngadto sa social media nga ginakonsidera niining usa ka animal cruelty, diin nahitabo kini sa Island Garden City of Samal.
Sa maong video nga mikatag online, makita nga gibalibag sa mga walay buot nga mga indibidwal ang makaluluoy kaayong iring, diin maoy hinungdan nga gikasuko kini sa mga nakalantaw sa maong video online.
Sumala pa sa Bantay Hayop, nga kinahanglan matud pang tabangan ang iring gumikan nahimo ra sab kini nga biktima gikan sa mga tawo nga walay kaluoy sa mga mananap, rason nga gipanawagan karun sa kadaghanan nga silotan ang maong indibidwal.
Subay sa post sa uploader nga giilang si Geb Sencio, makita nga nangayo kini og pasaylo ug giangkon niini ang kasaypanang gibuhat labot sa pagdaogdaog sa usa ka makaluluoy nga hayop.
Gikanayon niini nga nasayod na matud pa siya nga sayop gayud ang iyahang gibuhat, apan gipasangil niini nga nadala ra sumala pa siya sa ilahang giinum nga ilimnong makahubog, rason nga ilaha matud pa kadtong gibuhat ang maong binuhatan.
Sa karun, ginatun-an pa sa pipila ka mga animal advocate og pasakahan ba kini og kaso ang mga nahisgutan, aron nga matagam ug dili na kini pamaresan sa uban.
