Gipaimbestigahan karon sa Board of Directors sa AI firm nga Astronomer ang ilang CEO nga si Andy Byron ug Chief People Officer nga si Kristin Cabot human masapnan sa kiss cam sa Coldplay concert niadtong Hulyo 16, 2025 sa Gillette Stadium sa Massachusetts.
Nakita sa footage nga naggakos ang duha apan dali nga mitago sa kamera pagkahibalo nga naka-feature sila sa jumbotron.
Ang lead vocalist sa banda nga si Chris Martin miingon, “Either they’re having an affair or they’re just very shy,” nga misangpot sa viral nga espekulasyon online.
Gikumpirma sa mga netizen ang ilang pagkatawo ug gituohang aduna silay romantic involvement bisan pa man nga si Byron kasado ug aduna’y pamilya.
Sa laing bahin, si Cabot, divorce sa iyang kanhing bana nga si Kenneth Thornby sukad pa sa tuig 2022.
Gipahibalo sa Astronomer nga naka-leave ang duha samtang nagpadayon ang internal investigation.
Samtang mitungha usab ang peke nga “apology letter” nga giangkon kuno nga gisulat ni Byron, apan gipanghimakak kini sa kompanya ug giingong dili tinuod.
Ang maong post naggikan sa account nga nagpakaaron-ingnon nga reporter sa CBS News.
Dugang pang isyu, gi-remove sa asawa ni Byron ang iyang apelyidong “Byron” sa social media usa ka lihok nga gitun-an sa publiko isip posibleng timailhan sa panagbulag o padulong nga diborsyo.
Hangtod karon, wala pa’y opisyal nga pahayag gikan kang Byron, Cabot, o sa kompanya sukad misingabot ang iskandalo.
