DAVAO CITY – Nagpahayag sa iyang sintemyento ang political analyst ug Ateneo de Davao University Professor Ramon Belleno III mahitungod sa giaprubahang SIM Registration Law.
Sa nahimong pakighinabi sa Bombo Radyo Davao, gikanayon ni Belleno nga mamahimong dakong tabang ang maong balaod sa pagpakgang sa mga kriminalidad gamit ang cellular phones, sama sa nagpahinabong text scams nga nagdala ug diskumpyadong mga links nga kon mahilabtan, maka-access kini ug personal nga impormasyon sa tag-iya.
Samtang gikabalak-an sab ang posibleng panghilabot sa gobyerno sa data privacy sa mga users.
Matud pa, dili pa kaayo ligdong ang pagpaneguro sa privacy sa matag nagagamit ug elektronkong hinagiban nga posibleng magamit sa scamming. Gisugyot sab ni Belleno nga magpahigayon ug information dissemenation aron mapahibalo ang publiko aron makampante ang kadaghanan gikan sa gikabalak-ang breach of privacy.
Kon basehan ang kaandam sa publiko a maong balaod, gikabutyag sab ni Belleno nga kon ugaling mahitabo ang pagkuyanap sa data breach, nasayod ang katawhan sa kung kinsa ang pagadid-an niini.
via || Bombo LJ Florendo
