DAVAO CITY – Pabilin pa gihapon nga blangko ang kapulisan kalabot sa pagpatay sa usa ka anak sa Barangay Kapitan sa Barangay Sibayan sakop sa Bansalan Davao del Sur.
Gikanayong pauli na gikan sa iyang trabaho ang biktima nga si Ericson Dicdican, 27 anyos, residente sa maong dapit samtang sakay sa iyang motorsiklo ug gisubay ang Lapu-lapu Extension Digos apan pag-abot niini sa Purok Pichay diin duol na sa ilang panimalay, gitaparan kini ug duruha ka lalaki nga sakay sab sa motor diretso nga gipusil tumong sa likod nga bahin sa iyang ulo nga maoy hinungdan sa iyang hinanali nga kamatayon.
Narekober sa crime scene ang usa ka basiyo sa 9mm pistol ug usa ka balines. Kalakip sa gisubay karon sa otoridad ang motibo sa krimen.
Nasayran nga wala sumala pa kini’y kaaway sa trabaho sa usa ka kompanya sa motorsiklo sa dakbayan sa Digos.
Ang biktima anak ni Sibayan, Bansalan, Barangay Captain Eddie Dicdican nga gikatahapang nakikonsabo kaniadto sa mga New People’s Army human nga gitawgan ang duha ka mga patrol car sa mga police, diin ang ikaduhang patrol car gipabuthan ug landmine ug girakrakan sa mga rebelde.
Upat ka mga police ang patay sa nahisgutan nga pagpang-ambush niadtong Marso 7, nga n aila nga sila si Police Officer 1 (PO1) Rolly Benelayo, PO1 Joe Narvaza, PO1 Saro Mangutara, sa Bansalan Municipal Police Station, ug PO3 Jayden May Rabor sa Scene of the Crime Operations (Soco) sa Digos City.
Ang usa pa ka police nga si PO3 Allen Arnado, samdon apan naka-ikyas ug wala makita sa mga NPA.
Kalakip si Barangay Captain Eddie Dicdican sa mga gikasohan kalabot sa nahisgutan nga pagpang-ambush.
