MAGUINDANAO DEL NORTE – Gipusil-patay ang usa ka amahan atubangan sa 3 ka mga menor de edad niining anak sa Barangay Taviran, Datu Odin Sinsuat sa Maguindanao del Norte niadtong adlawng Lunes, Oktobre 14 ning tuiga.
Subay sa rekord, giila ang biktima nga mao si Juhari Saidona Karim, 37-anyos, usa ka multicab driver ug residente sa naasoy nga dapit.
Nasayrang sakay sa multicab sa biktima ang 3 niini ka mga menor de edad nga anak ug nasaksihan og giunsa pagpatay ang ilang amahan.
Paingon matud pa sa usa ka refilling station ang mga bitkima aron nga magkabo og tubig, apan girakrakan kini sa wala pa mailhing suspetsado rason sa hinanaling kamatayon niini.
Hinoon, anaa sa luwas nga kahimtang ang mga batan-on, apan nagbangutan pag-ayo ang tagtungod sa biktima rason nga nanawagan kini sa otoridad nga maangkon ang hustisya sa hinanaling panahon.
